Maagang pangangampanya?

Malayo pa ang eleksyon pero ngayon pa lang ay mayroon nang mga patalastas  ng iba't ibang pulitiko ang nagsisilabasan. Kung titingin tayo sa paligid lalo na sa mga tabi ng kalsada at mga poste sa kalye, mapapansin natin na dumarami ang bilang ng mga karatulang may malalaking larawan at pangalan ng mga pulitiko.

Sa isang araw, ilang beses kong napanood sa TV ang patalastas kung saan pinapakita ang Pangalawang Pangulong si Jejomar Binay na tumutulong sa pagbibigay ng bahay para umano magkaroon ng magandang buhay ang mga Pilipino. Ito ay may mensaheng “VP Binay Pabahay para sa magandang buhay.”

Si Binay ay isa nga sa mga napapabalitang tatakbong Pangulo sa halalan sa 2016. Ayon sa survey, bumababa ang porsyento ng mga taong may gusto sa kanya dahil sa samu't saring isyu na bumabatikos sa kanya. Alam naman natin ang mga kontrobersiyang kinakaharap niya ngayon at hanggang ngayon ay iniimbestigahan pa rin siya dahil sa kanya umanong tagong yaman at ari-arian sa Rosario, Batangas at ang maanumalyang presyo ng gusali sa Makati.

Para sa akin, masyado pang maaga ang kanyang ginagawang pangangampanya (kung maaari man itong tawaging pangangampanya). Kahit hindi man direkta ang pagsabi ng kanilang pangangampanya sa mga patalastas na ito ay parang ganun din ang mensahe na nakikita kong nais iparating. Sa pamamagitan ng mga ito, kahit papaano ay napapabango nila ang kanilang mga pangalan sa kabila ng mga isyung kinakaharap niya. Para kahit papaano ay makuha niya ang loob at boto ng mga tao. Kung may mensahe man na nais iparating ang kanilang ahensya na kinabibilangan, mas maganda kung iiwasan na lang sana nila ang paglabas sa mga patalastas na ito. Ang nangyayari kasi, imbes na mag-focus yung patalastas tungkol sa kanilang proyekto, mas maraming naipapalabas tungkol kay Binay na matuturing nating pamumulitika.

2012-33633 (1)

(Editor's note: The subject is Communication Ethics. To the blogger, it would have been better if you were able to contextualize politicians as some sort of communicators or at least, the agencies that produce their "early campaign ads.")

Ang 'Ten Kumainments'

       Noong Oktubre, inilunsad ng Department of Health - National Nutrition Council ang kanilang patalastas na "Ten Kumainments." Ito ay para sa kanilang kampanya sa pagtaguyod ng tamang nutrisyon at tamang pag-aalaga sa kalusugan ng mga Pilipino. Sa patalastas, ipinakita ang pag-abot ni Mang Moi sa mga tao ng dalawang malaking tinapay kung saan nakasulat ang Ten Kumainments.

Para sa akin, maganda naman ang mensahe ng kanilang kampanya dahil kahit papaano ay nakakapagbigay sila ng ilang mga paalala tungkol sa pagbibigay halaga sa kalusugan ng mga tao. Sa pagpapalabas ng kampanyang ito ay nakatanggap sila ng mga magandang reaksyon galing sa maraming tao. Ngunit may mga ilang tao pa rin na nagsasabing may mali ang panggamit nila isang maka-Diyos na paniniwala.

Iba't ibang negatibong reaksyon ang natanggap nito. Sabi ng ilan, hindi raw nito nirerespeto ang paniniwala ng mga Katoliko. May nagkumento rin sa isang post sa Facebook na parang pinapalitan na raw nito yung totoong sampung utos. May mga nagsabi rin na huwag dapat natin biruin ang salita ng Diyos dahil ito ay sagrado. Hindi raw ito magandang gamitin para sa kung ano man na wala namang kinalaman sa ispirituwal na mga usapin.

Hindi naman sa sinasabi kong nabastos nito ang totoong Ten Commandments. Naiintindihan ko naman na nais lang paalalahanan ng DOH ang mga tao sa magandang paraan at hindi nila sinasadyang magkaroon tayo ng ibang ideya sa paggamit nila ng konseptong iyon. Sa tingin ko, wala naman talaga itong sinabi na kahit anong masama tungkol doon. Pero sana, ang ginawa na lang dapat ng DOH ay mag-isip ng ibang konsepto dahil marami pa namang ibang ideya na pwede nilang gamitin kung saan hindi na nila kakailanganing gumamit ng isang konseptong panrelihiyon.


2012-33633 (2)